மனமும் சுவையும் நிறைந்த ஆந்திரா சேப்பங்கிழங்கு குழம்பு செய்முறை

ஆந்திரா சமையலில் எத்தனையோ காரசாரமான உணவுகள் உள்ளன. ஒவ்வொன்றிலும் சுவை மாறுபடும். ஆந்திரா சமையலுக்கு நீங்கள் பழகி விட்டால் நாக்கு நன்கு ருசி கண்டு விடும். வாரத்திற்கு 3-4 முறையாவது ஆந்திரா உணவுகளை சாப்பிடும் பழக்கத்திற்கு மாறிவிடுவீர்கள். அந்த வகையில் ஆந்திரா சேப்பங்கிழங்கு செய்முறை பற்றி இந்த பதிவில் பார்ப்போம். சேப்பங்கிழங்கு ஃப்ரை கட்டாயம் சாப்பிட்டு இருப்பீர்கள். எனினும் இந்த சேப்பங்கிழங்கு குழம்பின் ருசி அதை விட அதிகமானது. ஆந்திராவில் இதை chamadumpala pulusu என்றழைக்கின்றனர். அரை மணி நேரத்தில் சேப்பங்கிழங்கு குழம்பை தயாரித்து விடலாம்.

சேப்பங்கிழங்கு குழம்பு செய்யத் தேவையானவை

சேப்பங்கிழங்கு
பெரிய வெங்காயம் 
தக்காளி
பச்சை மிளகாய்
கொத்தமல்லி 
கறிவேப்பிலை 
புளி
தனியா தூள்
மஞ்சள் தூள்
மிளகாய் தூள்
சீரகம் 
கடுகு
நல்லெண்ணெய்
வர மிளகாய்

மேலும் படிங்க ஆந்திரா ஸ்டைல் மஜ்ஜிகா சாறு எனும் மோர் குழம்பு செய்முறை

சேப்பங்கிழங்கு குழம்பு ரெசிபி

• முதலில் அரை கிலோ சேப்பங்கிழங்கை தண்ணீரில் நன்கு கழுவி பாத்திரத்தில் போட்டு மூழ்கும் அளவிற்கு தண்ணீர் ஊற்றி 10 நிமிடங்களுக்கு வேக வைக்கவும்.
• இதனிடையே எலுமிச்சை சைஸ் புளியை 100 மில்லி தண்ணீர் ஊற்றி கரைக்கவும்.
• சேப்பங்கிழங்கு வெந்த பிறகு கொஞ்சம் சூடு குறைந்தவுடன் தோல் உரித்திடுங்கள்.
• இப்போது கடாயில் மூன்று ஸ்பூன் எண்ணெய் ஊற்றி அரை ஸ்பூன் கடுகு போடுங்கள். கடுகு வெடித்தவுடன் ஒரு ஸ்பூன் சீரகம் சேர்க்கவும். 
• அதன் பிறகு கொஞ்சம் கறிவேப்பிலை, இரண்டு வர மிளகாய் போட்டு வறுக்கவும். அடுத்ததாக இரண்டு பெரிய வெங்காயத்தை பொடிதாக நறுக்கி போட்டு வதக்கவும். 
• இதை தொடர்ந்து இரண்டு தக்காளியை நறுக்கி சேர்த்து பச்சை வாடை போகும் வரை வதக்கி நான்கு பச்சை மிளகாய், கால் டீஸ்பூன் மஞ்சள் தூள், ஒரு டீஸ்பூன் மிளகாய் தூள், ஒரு டீஸ்பூன் தனியா தூள், தேவையான அளவு உப்பு போடவும். 
• அனைத்தையும் கலந்து விட்டு இரண்டு நிமிடங்கள் கழித்து புளி தண்ணீர் ஊற்றுங்கள்.
• 5 நிமிடங்களுக்கு குழம்பு கொதிக்கட்டும். இறுதியாக கொத்தமல்லி சேர்த்து ஒரு நிமிடத்திற்கு மீண்டும் கொதிக்க விடுங்கள். சுவையான ஆந்திரா சேப்பங்கிழங்கு குழம்பு ரெடி. 
• சாதத்தில் அப்படியே ஊற்றி பிசைந்து சாப்பிடலாம். ஸைட் டிஷ் என எதுவும் தேவையில்லை. சுவைக்கும் போது தெலுங்கில் சால பாகுந்தி என கட்டாயம் சொல்வீர்கள்.
• காரம் அதிமாக தெரிந்தால் கொஞ்சம் வெல்லம் சேர்க்கலாம்.

இதுபோன்ற கட்டுரைகளுக்கு ஹெர் ஜிந்தகியுடன் தொடர்ந்து இணைந்திருங்கள்.