உடல் உஷ்ணத்தை அதிகரிக்க செய்யும் உணவுகள் எவை தெரியுமா?

இந்த பருவ காலத்தில் சூடாக ஏதாவது சாப்பிடுவது அல்லது குடிப்பது, போர்வைக்குள் சௌகரியமாக இருப்பதும் நம் அனைவரின் உணர்வாகவும் விருப்பமாகவும் இருக்கிறது. குளிர் காலம், நிச்சயமாக ஒருவருக்கு அதிகப்படியான பசியையும் உண்டாக்குகிறது, ஏனெனில் வெப்பநிலையில் ஏற்படும் வீழ்ச்சி பசியைத் தூண்டுகிறது.

குளிர்காலத்தில் உடலைச் சூடாக மாற்ற நீங்கள் சாப்பிட வேண்டிய உணவுகள்

சூப்புகள்

காய்கறிகள், பருப்பு வகைகள், பாகற்காய், பார்லி ஆகியவற்றால் செய்யப்பட்ட சூப்புகள் சிறந்த தேர்வாக இருக்கும். இவை நம் உடலை உள்ளிருந்து சூடாக வைத்திருக்கின்றன. சீரகம், மிளகு மற்றும் இஞ்சி போன்ற மசாலாப் பொருட்களை உங்கள் சூப்பில் சேர்த்துக் கொள்ளுங்கள்.

மசாலாக்கள்

மசாலாக்கள் உடலின் வெப்பநிலையைப் பராமரிக்க ஒரு சிறந்த வழியாகும். இஞ்சி, சீரகம், மிளகு, எள், இலவங்கப்பட்டை போன்ற சில கிட்சன் சூப்பர் ஸ்டார்ஸ் இதில் அடங்கும். இஞ்சியைத் தேநீர் அல்லது தண்ணீரில் கொதிக்க வைத்துக் குடிக்கலாம். உங்கள் உடலை நீண்ட நேரம் சூடாக வைத்திருக்கச் சீரகம் உதவுகிறது. எனவே, உங்கள் சமையலில் சீரகத்தை சேர்த்து கொள்ளுங்கள். இலவங்கப்பட்டை தூளை சாலடுகள், ஜூஸ் வகைகளில் ஒரு சிட்டிகை சேர்க்கலாம். இரவு தூங்குவதற்கு முன் மஞ்சள் பொடி, மிளகு சேர்த்த பால் குடிப்பது கூடுதல் நன்மை அளிக்கிறது.

பூண்டு

பூண்டு இந்த குளிர் காலத்திற்குச் சிறந்தது. இதனை பூண்டு குழம்பு, பூண்டு தொக்கு போன்ற வகையில் சேர்க்கலாம், இல்லையென்றால் இந்த எளிமையான முறையைப் பின்பற்றுங்கள். ஒரு கடாயில் நெய்யைச் சூடாக்கி நறுக்கிய பச்சை பூண்டு, மஞ்சள் தூள் மற்றும் மிளகாய்த் தூள், சிறிது உப்பு சேர்த்து நன்கு வதக்கி உணவுடன் சேர்த்துச் சாப்பிடவும். நெய்யை நன்கு சூடாக்குவதை உறுதிப்படுத்திக் கொள்ளுங்கள், ஏனென்றால் மீதமுள்ள பொருட்கள் தானாகவே வெப்பத்தில் சமைக்கப்படும். நெய்யும் உடல் சூடாக்குவதற்குப் பெரிதும் உதவும்.

இந்த பதிவும் உதவலாம்: இயற்கையாகவே உடலை கதகதப்பாக வைத்துக்கொள்வது எப்படி என தெரியுமா?

கத்திரிக்காய்

கத்தரிக்காய் உடம்பில் சூட்டை ஏற்படுத்தும். நீர்க்கனத்தைக் குறைத்து உடல் பருமனையும் குறைக்கும். உடம்பில் சொறி சிரங்கு, புண் உள்ளவர்கள் கத்திரிக்காயைத் தவிர்ப்பது நல்லது. உடலுக்குச் சூடு தரும் காய் என்பதால் அரிப்பை உண்டாக்கும். மேலும் புண்கள் ஆறவும் அதிக நாள் ஆகும். குளிர் காலத்தில் உடல் கதகதப்பாய் இருக்கக் கத்தரிக்காய் குழம்பு மற்றும் வற்றல் சமைத்து உண்ணலாம்.

இறைச்சி

இறைச்சி வகை உணவுகளான சிக்கன் அதிலும் குறிப்பாக நாட்டுக்கோழி, மீன் வகைகளில் மத்தி, நெத்திலி போன்றவை உடல் வெப்பநிலையை அதிகரிக்கிறது. இவை இரும்பு மற்றும் புரதத்தின் சிறந்த மூலமாக இருக்கின்றன.

சில கூடுதல் குறிப்புகள்

• குளிர் காலங்களில் கோதுமை உணவுகளை அதிகம் சேர்த்துக் கொள்ளுங்கள்.

• பாதாம், முந்திரி, அக்ரூட் பருப்புகள் ஆகியவை நல்ல கொழுப்புகளின் சிறந்த மூலமாகும், மேலும் உடல் வெப்பநிலையைச் சீராக்க உதவுகிறது.

• இந்த பருவ காலங்களில் கிடைக்கும் பழங்களைத் தவற விடாதீர்கள்.

• கறிவேப்பிலையை பொடி, சட்னி அல்லது குழம்பாகச் செய்து உட்கொள்ளலாம்.

• பிரண்டை சட்னி அல்லது பிரண்டை உணவுகள் உடல் சூட்டிற்கு மிகவும் உதவும்.

• குளிர் காலங்களில் நெய் உங்கள் நோய் எதிர்ப்புச் சக்தியை வலுப்படுத்த உதவுகிறது.

• தேன் குளிர்காலத்தில் கூட உதவும், ஏனெனில் அவை இருமல் மற்றும் சளிக்கான சிகிச்சையாகப் பாரம்பரியமாகப் பயன்படுத்தப்படுகிறது.

எளிதில் ஜீரணிக்கக்கூடிய உணவுகளைத் தேர்வு செய்யுங்கள் எந்த வகை உணவாக இருந்தாலும், சூடாக உண்ணும் பழக்கத்தைக் குளிர் காலத்தில் பின்பற்ற முயற்சி செய்யலாம்.

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் லைக் செய்யவும். ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

Images Credit: freepik