Dandruff Home Remedies: குளிர்காலத்தில் அதிகரிக்கும் பொடுகு தொல்லையை கட்டுப்படுத்த உதவும் 5 வீட்டு வைத்தியங்கள் இதோ

Natural Remedies for Dandruff: குளிர்காலம் என்றாலே இதமான காலநிலை, சுவையான சூடான உணவுகள் மற்றும் பண்டிகை கால கொண்டாட்டங்கள் தான் நினைவுக்கு வரும். ஆனால், அதே சமயம், இந்தக் காலத்தில் சருமம் மற்றும் கூந்தல் சார்ந்த சில பிரச்சனைகளும் உருவாக தொடங்கும். குறிப்பாக, பலருக்கும் தொல்லை கொடுக்கும் பொடுகு (Dandruff) ஒரு முக்கிய பிரச்சனையாக இருக்கும்.

சருமம் வறண்டு போகும் போதும், கூந்தலுக்கு போதுமான ஈரப்பதம் இல்லாத போதும், பொடுகு தொல்லை ஏற்படும். இது வெறும் கூந்தல் பிரச்சனை மட்டுமல்ல. இந்த பொடுகு முகத்தில் படும் போது பருக்கள் மற்றும் வீக்கம் போன்றவற்றையும் உருவாக்கும். எனினும், இந்த பொடுகு தொல்லையை கட்டுப்படுத்தவும், நீக்கவும் நம்முடைய வீட்டிலேயே சில பொருட்கள் இருக்கின்றன.

இரசாயனங்கள் நிறைந்த ஷாம்பூக்களை நாடுவதற்கு பதிலாக, நம் பாரம்பரியத்தில் இருந்து வரும் இயற்கை வைத்தியங்களை முயற்சி செய்யலாம். எளிதில் கிடைக்கக் கூடிய மற்றும் பொடுகை எதிர்த்து போராட உதவும் 5 ஆற்றல் மிகுந்த வீட்டு வைத்தியங்கள் குறித்து இந்தக் கட்டுரையில் விரிவாக பார்க்கலாம்.

தேங்காய் எண்ணெய் மற்றும் எலுமிச்சை சாறு:

பொடுகு தொல்லையை தீர்க்கும் வீட்டு வைத்தியங்களில், இது மிகவும் எளிமையானது மற்றும் மிகவும் பிரபலமான ஒன்று. தேங்காய் எண்ணெய் கூந்தலுக்கு தேவையான ஆழமான ஊட்டச்சத்தையும், ஈரப்பதத்தையும் அளிக்கிறது, அதே சமயம் எலுமிச்சை சாறு அதன் இயற்கையான அமிலத்தன்மை காரணமாக பொடுகு ஏற்படுத்தும் பூஞ்சையை கட்டுப்படுத்த உதவுகிறது.

செய்முறை:

• உங்கள் கூந்தலின் நீளத்திற்கு ஏற்ப சுமார் 2 தேக்கரண்டி தேங்காய் எண்ணெய்யை லேசாக சூடுபடுத்தவும்.
• இந்த சூடான எண்ணெய்யில், சம அளவு எலுமிச்சை சாற்றை சேர்க்கவும்.
• இந்தக் கலவையை உங்கள் உச்சந்தலையில் நன்கு படும்படி மெதுவாக மசாஜ் செய்யவும்.
• சுமார் 20 நிமிடங்கள் அப்படியே வைத்திருந்து, பின்னர் உங்களுக்கு பொருத்தமான மிதமான ஷாம்பூவை பயன்படுத்தி குளித்து விடலாம்.
• சிறந்த பலன் கிடைக்க வாரத்திற்கு இரண்டு முறையாவது இந்த வைத்தியத்தை பின்பற்றவும். உச்சந்தலை வறண்டு போகாமல் ஈரப்பதத்துடன் இருப்பதை உறுதிப்படுத்திக் கொள்ளுங்கள்.

மேலும் படிக்க: Hair Care Tips: பாரம்பரிய கூந்தல் பராமரிப்பு முறையை பயன்படுத்தி உங்கள் முடி வளர்ச்சியை அதிகரிக்க உதவும் எளிய குறிப்புகள்

வெந்தயம்:

வெந்தயம் என்பது பொடுகை தடுக்கும் மற்றும் சிகிச்சையளிக்கும் ஒரு சிறந்த பொருள் ஆகும். இதில் உள்ள பூஞ்சை எதிர்ப்பு மற்றும் பாக்டீரியா எதிர்ப்பு பண்புகள் பொடுகு தொல்லைக்கு காரணமான பூஞ்சை வளர்ச்சியை தடுக்கின்றன. வெந்தயம், கூந்தலுக்கு ஆரோக்கியமான பளபளப்பையும் கொடுக்கிறது.

செய்முறை:

• தேவையான அளவு வெந்தயத்தை எடுத்து இரவு முழுவதும் தண்ணீரில் ஊற வைக்கவும்.
• காலையில் ஊறிய வெந்தயத்தை எடுத்து, நன்கு அரைத்து விழுதாக மாற்றவும்.
• இந்த வெந்தய விழுதுடன் சிறிது எலுமிச்சை சாறை சேர்த்து நன்கு கலக்கவும்.
• இந்தக் கலவையை உச்சந்தலையில் மற்றும் கூந்தலில் தடவி, சுமார் 30 நிமிடங்கள் ஊற வைக்கவும்.
• அதன் பிறகு, ஷாம்பூ பயன்படுத்தி குளித்து விடலாம். இது பொடுகை தடுப்பதுடன் கூந்தலுக்கு இயற்கையான பளபளப்பை அளிக்கும்.

தயிர்:

கூந்தல் பராமரிப்புக்கு மிகவும் நன்மை அளிக்கும் ஒரு பொருளாக தயிர் விளங்குகிறது. இது இயற்கையான கண்டிஷனராக செயல்படுவதுடன், இதில் உள்ள புரோபயாடிக்ஸ் மற்றும் லாக்டிக் அமிலம், பொடுகுக்கு காரணமான பூஞ்சையை கட்டுப்படுத்த உதவுகிறது. இது உச்சந்தலையில் உள்ள அரிப்பையும், எரிச்சலையும் குறைக்கிறது.

செய்முறை:

• தயிரை எடுத்து நேரடியாக உங்கள் உச்சந்தலையில் நன்கு தேய்க்கவும். சிறிது மசாஜ் செய்தால் கூடுதல் பலன் கிடைக்கும்.
• இந்த தயிர் முழுவதுமாக உலர்ந்து, கெட்டியாக மாற சுமார் ஒரு மணி நேரம் வரை காத்திருக்கவும்.
• இதற்கடுத்து, அதிக இரசாயனங்கள் இல்லாத மிதமான ஷாம்பூ கொண்டு தலைக்கு குளித்து விடலாம்.
• தயிரின் வாசனை சிலருக்கு ஒவ்வாமையாக இருக்கலாம். அப்படிப்பட்டவர்கள், குளித்த பின்னர் லேசான வாசனை கொண்ட கண்டிஷனரை பயன்படுத்தலாம்.

மேலும் படிக்க: Hair care tips: ஆரோக்கியமான கூந்தல் வளர்ச்சிக்கு நீங்கள் பின்பற்ற வேண்டிய சிறந்த குறிப்புகள்

முட்டையின் மஞ்சள் கரு:

முட்டையின் மஞ்சள் கரு, பொடுகை எதிர்த்து போராட உதவும் ஒரு முக்கிய வைட்டமினான பயோட்டின் நிறைந்தது. பயோட்டின் கூந்தலுக்கு உள்ளிருந்து ஊட்டமளித்து, முடி உதிர்வதை தடுக்க மற்றும் பொடுகு பிரச்சனையை கட்டுப்படுத்த உதவும். மேலும், இது கூந்தலுக்கு இயற்கையான கண்டிஷனராக செயல்பட்டு, முடியை மென்மையாகவும், ஆரோக்கியமாகவும் மாற்றுகிறது.

செய்முறை:

• முட்டையின் மஞ்சள் கருவை மட்டும் தனியாக பிரித்தெடுக்கவும்.
• இந்த மஞ்சள் கருவை உச்சந்தலையில் மற்றும் கூந்தலில் நன்கு தடவவும்.
• இந்தக் கலவை காயாமல் இருக்க, உங்கள் தலையை ஒரு பிளாஸ்டிக் பை அல்லது ஷவர் கேப் கொண்டு ஒரு மணி நேரம் மூடி வைக்கவும்.
• அதன் பிறகு, முட்டையின் வாசனை நீங்கும் அளவிற்கு ஷாம்பூ கொண்டு குளித்து விடலாம்.

வேப்பிலை:

பொடுகு தொல்லைக்கு தீர்வு தரும் மற்றொரு அற்புத பொருளாக வேப்பிலை சாறு அமைகிறது. இதனை பாரம்பரியமாக கூந்தல் பராமரிப்பு முறையில் பயன்படுத்தி வருகின்றனர். அந்த அளவிற்கு இதில் மருத்துவ குணங்களும் நிறைந்திருக்கின்றன.

செய்முறை:

• உங்கள் கூந்தலுக்கு தேவையான அளவிற்கு வேப்பிலையை எடுத்து நன்றாக அரைத்து பசை பதத்திற்கு மாற்றிக் கொள்ள வேண்டும்.
• இதனை உங்கள் கூந்தலில் நன்கு தடவி விட்டு சுமார் 10 நிமிடங்களுக்கு அப்படியே வைத்திருக்க வேண்டும்.
• இதற்கடுத்து நன்றாக தேய்த்து தலைக்கு குளிக்க வேண்டும். இதன் மூலம் பொடுகு தொல்லை குறையத் தொடங்கும். 

இவற்றில் உங்கள் கூந்தலுக்கு ஏற்ற பொருட்களை தேர்வு செய்து பயன்படுத்தி வந்தால் பொடுகு பிரச்சனையை கட்டுப்படுத்தலாம். மேலும், இவற்றை தொடர்ந்து பின்பற்றும் போது நல்ல பலன்களை பெறலாம்

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik