Oily Skin Face Pack: குளிர்காலத்தில் அதிக எண்ணெய் பசை கொண்ட சருமத்திற்கு இந்த 5 ஹோம்மேட் ஃபேஸ் பேக்கை பயன்படுத்தவும்

Skin Care Routine: குளிர்காலம் தொடங்கியதில் இருந்து சரும பராமரிப்பில் கூடுதல் கவனம் செலுத்த வேண்டியது மிக அவசியம். பொதுவாக, பனிக்காலத்தில் சருமம் வறண்டு போகும் என்று நமக்கு தெரியும். ஆனால், அதிக எண்ணெய் பசை சருமம் உள்ளவர்களுக்கு இந்த காலம் சற்று சவாலானது. குளிர்கால காற்று சருமத்தை வறட்சியடைய செய்யும் அதே வேளையில், சருமம் தன்னை பாதுகாத்துக் கொள்ள அதிகப்படியான எண்ணெய்யை சுரக்க தொடங்கும்.

எண்ணெய் பசை சருமத்திற்கான ஃபேஸ்பேக்:

இதனால் முகம் ஒருவித மங்கலான தோற்றத்துடனும், பிசுபிசுப்புடனும் காணப்படும். இந்த சூழலில் இரசாயனங்கள் கலந்த க்ரீம்களை பயன்படுத்துவதை விட, இயற்கையான ஃபேஸ் பேக்குகளை பயன்படுத்துவதே சிறந்த தீர்வாகும். இது சருமத்தின் எண்ணெய் பசையை கட்டுப்படுத்துவதோடு, முகத்தை பொலிவாகவும் மாற்றும். குளிர்காலத்தில் எண்ணெய் பசை சருமத்திற்கு ஏற்ற 5 சிறந்த ஃபேஸ் பேக்குகள் குறித்து இதில் காண்போம்.

கடலை மாவு மற்றும் மஞ்சள் ஃபேஸ் பேக்:

பாரம்பரியமாக, நமது அழகுக் குறிப்புகளில் தவறாமல் இடம்பெறும் இரண்டு பொருட்களாக இவை விளங்குகின்றன. கடலை மாவு சருமத்தில் உள்ள அதிகப்படியான எண்ணெய்யை உறிந்து கொள்ளும் தன்மை கொண்டது.

தேவையான பொருட்கள்:

• கடலை மாவு - 1 கப் (தேவைக்கு ஏற்ப குறைத்துக் கொள்ளலாம்)
• மஞ்சள் தூள் - ஒரு சிட்டிகை
• பால் - தேவையான அளவு

செய்முறை:

• ஒரு கிண்ணத்தில் கடலை மாவு மற்றும் மஞ்சளை எடுத்து கொள்ளவும்.
• இதனுடன் சிறிது காய்ச்சாத பாலை சேர்த்து நன்கு பசை பதத்திற்கு கலக்கவும்.
• இந்த கலவையை முகத்தில் தடவி 15 நிமிடங்கள் கழித்து கழுவவும்.

இது சருமத்தில் உள்ள சீபம் (Sebum) எனப்படும் எண்ணெய் சுரப்பை சமநிலைப்படுத்துகிறது. பால், சருமத்திற்கு மென்மையை அளிக்கும் அதே வேளையில், மஞ்சள் கிருமிகளை தடுத்து முகத்தை ஜொலிக்க வைக்கும்.

மேலும் படிக்க: Winter Face Pack: குளிர்காலத்தில் மங்கிப் போன சருமத்தை பொலிவாக மாற்ற உதவும் 5 ஹோம்மேட் ஃபேஸ்பேக்

கற்றாழை மற்றும் மஞ்சள் ஃபேஸ் பேக்:

கற்றாழை அனைத்து வகை சருமத்திற்கும் ஏற்ற ஒரு அற்புதமான மூலிகை ஆகும். இது குளிர்காலத்தில் சருமம் வறண்டு போகாமல் பார்த்துக் கொள்ளும்.

தேவையான பொருட்கள்:

கற்றாழை ஜெல்

மஞ்சள் தூள்

செய்முறை:

• கற்றாழை ஜெல்லுடன் சிறிதளவு மஞ்சளை சேர்த்துக் கலக்கவும்.
• இதை முகத்தில் தடவி 5 முதல் 7 நிமிடங்கள் வரை மெதுவாக மசாஜ் செய்யவும்.
• பின்னர் குளிர்ந்த நீரால் முகத்தை கழுவவும்.

இது எண்ணெய் பசை சருமத்திற்கு மிக சிறந்த ஃபேஸ் பேக் ஆகும். கற்றாழை சருமத்திற்கு தேவையான நீர்ச்சத்தை அளிக்கிறது. இந்த எளிய முறையை தொடர்ந்து செய்தால், சில நாட்களிலேயே முகம் பளபளப்பாக மாறுவதை உணரலாம்.

முல்தானி மட்டி மற்றும் பன்னீர் ஃபேஸ் பேக்:

எண்ணெய் பசை சருமம் உள்ளவர்களுக்கு முல்தானி மட்டி ஒரு வரப்பிரசாதம் என்று கூறலாம். இது சருமத் துளைகளில் இருக்கும் அழுக்குகளை நீக்க பெரிதும் உதவுகிறது.

தேவையான பொருட்கள்:

• முல்தானி மட்டி - 1 டேபிள் ஸ்பூன்
• பன்னீர்- தேவையான அளவு

செய்முறை:

• முல்தானி மட்டியுடன் பன்னீர் சேர்த்து கலந்து கொள்ளவும்.
• இதை முகம் மற்றும் கழுத்து பகுதிகளில் தடவி, நன்கு உலர்ந்து வரும் வரை விடவும்.
• பின்னர், வெதுவெதுப்பான நீரில் கழுவவும்.

முல்தானி மட்டி அதிகப்படியான எண்ணெய்யை உறிந்து விடும். பன்னீர், சருமத்திற்கு குளிர்ச்சியையும், புத்துணர்ச்சியையும் அளிக்கும். முகப்பரு வராமல் தடுக்க இது சிறந்த வழியாகும்.

மேலும் படிக்க: Curd for Glowing Skin: சருமத்தை பளபளப்பாக மாற்ற உதவும் 5 தயிர் ஃபேஸ்பேக்; வீட்டிலேயே ஈசியாக செய்யலாம் 

ஆரஞ்சு மற்றும் சந்தனம் கலந்த ஃபேஸ் பேக்:

ஆரஞ்சு பழத்தில் உள்ள வைட்டமின் சி, சருமத்தை பாதுகாப்பதில் முக்கிய பங்கு வகிக்கிறது. இது சரும துளைகளை சுத்தம் செய்து முகத்தை பிரகாசமாக்கும்.

தேவையான பொருட்கள்:

• ஆரஞ்சு சாறு - 2 டேபிள் ஸ்பூன்
• சந்தனப் பொடி - 1 ஸ்பூன்

செய்முறை:

• இவை இரண்டையும், ஒன்றாக கலந்து கட்டிகள் இல்லாதவாறு பசை பதத்திற்கு மாற்றவும்.
• இதை முகத்தில் தடவி 20 நிமிடங்கள் ஊறவிடவும்.
• பின்னர் குளிர்ந்த நீரால் கழுவவும்.

சந்தனம் சருமத்தில் ஏற்படும் தழும்புகளை மறைக்க உதவும். ஆரஞ்சு சாறு, சருமத்திற்கு தேவையான வைட்டமின் சி-யை அளித்து, முகத்தை உடனடியாக பொலிவாக்கும்.

கேரட் மற்றும் தேன் ஃபேஸ் பேக்:

மங்கலான சருமத்தை பொலிவாக்க இந்த ஃபேஸ் பேக் மிகவும் உதவும். கேரட்டில் உள்ள சத்துகள் சருமத்தை பளபளப்பாக்கும். மேலும், இது ஈரப்பதத்தை தக்க வைக்கவும் உதவுகிறது.

தேவையான பொருட்கள்:

கேரட் விழுது - 1 டேபிள் ஸ்பூன்

தேன் - 1 டேபிள் ஸ்பூன்

செய்முறை:

• வேகவைத்த அல்லது பச்சைக் கேரட்டை பசை போன்று அரைத்து அதனுடன் தேன் கலக்கவும்.
• இதை முகத்தில் தடவி 15 நிமிடங்கள் கழித்து கழுவவும்.

கேரட்டில் உள்ள பீட்டா கரோட்டின் (Beta carotene) இறந்த செல்களை நீக்க உதவுகிறது. தேன், சருமத்தின் ஈரப்பதத்தை தக்கவைத்து மென்மையாக மாற்றும்.

இந்தக் குளிர்காலத்தில் உங்கள் சரும பராமரிப்பு முறைகளில் இது போன்ற மாற்றங்களை செய்து பார்க்கலாம். இதன் மூலம் உங்கள் முகம் பொலிவாக மாறும்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik